EUR(H)OPE është një projekt i Erasmus+ që zgjat 24 muaj, i cili ka si qëllim të ndërtojë kapacitete të të rinjve të moshës 18-25 vjeç, që jetojnë në komunitetet kufitare si Mesdheu dhe Adriatiku, duke i angazhuar në aktivitete trajnimi dhe advokimi rreth identitetit evropian përmes teknikave gazetareske dhe metodologjive të “Edukimit Jo-Formal” (Non-Formal Education).

Ky projekt përfshin katër organizata; përkatësisht nga Shqipëria, Italia, Maroku dhe Spanja dhe synon të ofrojë një hapësirë për reflektim mbi një pyetje të kahershme: çfarë kuptimi ka koncepti i Evropës sot për ata që janë qytetarë të Bashkimit Evropian, për ata që do të bëhen qytetarë të saj dhe për ata që migrojnë për të jetuar në Bashkimin Evropian?

Ne e imagjinojmë Evropën jo si një hapësirë burokratike, por si një bashkësi të imagjinatave, identiteteve dhe një model demokracie. Por, a është ende kështu për të rinjtë nga shtetet që janë pjesë e Evropës (Spanja dhe Italia); për të rinjtë që duan t’i bashkohen Evropës (Shqipëria) apo për ata që përfaqësojnë një nga rrugët kryesore të migrimit drejt Evropës (Maroku)?

Ne imagjinojmë se, të pajisur me mjetet e duhura profesionale, ata do të jenë të aftë – tani dhe në të ardhmen – të ndërtojnë vetë narrativën e tyre, me qëllim që të sjellin në hapësirat vendimmarrëse të Bashkimit Evropian propozime që do të kontribuojnë për ta bërë idenë e Evropës gjithnjë e më të qëndrueshme dhe inovative. Ne gjithashtu besojmë se nëse kjo narrativë vjen nga vetë ata që përshkruhen si “njerëz në tranzit”, rëndësia është shumë më e madhe.